ការកាត់បន្ថយការបាត់បងស្រូវ អង្ករ ក្រោយពេលប្រមូលផល

ការកាត់បន្ថយការបាត់បងស្រូវ អង្ករ ក្រោយពេលប្រមូលផល

ការកាត់បន្ថយការបាត់បង់ស្រូវអង្ករ ក្រោយពេលច្រូតកាត់ សេចក្ដីផ្ដើម         ដោយខ្វះចំណេះដឹង​និង​ពុំសូវប្រុងប្រយ័ត្នក្នុងការប្រមូល និង​គ្រប់គ្រងធ្វើឱ្យកសិករកម្ពុជាភាគច្រើនជួបប្រទះនូវ​ការបាត់បង់​ផលស្រូវទាំង​បរិមាណ និងគុណ​ភាព ។ វិទ្យាស្ថាន​ស្រាវជ្រាវ​​​និង​​អភិវឌ្ឍន៍កសិកម្មកម្ពុជា (CARDI)​បានរកឃើញថា​​ចាប់ពី​ច្រូតកាត់រហូតដល់កិនជា​អង្ករមាន​ការ​បាត់បង់​​បរិមាណ​ស្រូវ​ប្រមាណជា ១២%​។​ជាងនោះទៅទៀតវិទ្យាស្ថាន​ស្រាវ​ជ្រាវ​​ដំណាំ​ស្រូវអន្ដរជាតិ (IRRI)​បានរកឃើញថាការធ្វេសប្រហែស​ក្នុងការ​គ្រប់គ្រង​​ផលិតផលនេះអាច​បណ្ដាល​ឱ្យ​​កសិករ​​ខាតបង់​រហូត​ដល់ ៥០% នៃតម្លៃស្រូវសរុបដែលគាត់គួរទទួលបាន ។          ផ្អែកទៅ​លើព័ត៌មាន​នេះនាយកដ្ឋានផ្សព្វផ្សាយកសិកម្មនៃក្រសួងកសិកម្ម រុក្ខាប្រមាញ់ និងនេសាទ ដោយមាន​កិច្ច​សហកា​របច្ចេកទេសពីគម្រោង “ការបង្កើន ជីវភាពកសិករក្រីក្រ​តាមរយៈការធ្វើឱ្យ​កាន់​តែ​ប្រសើរនូវការគ្រប់គ្រងស្រូវបន្ទាប់ ពីច្រូតកាត់​បានរៀបចំចងក្រងនូវឯកសារបច្ចេកទេស​នេះ​សម្រាប់​ជាជំនួយដល់មន្ដ្រី និងភ្នាក់ងារផ្សព្វផ្សាយក្នុងការបណ្ដុះបណ្ដាល និង​ផ្សព្វផ្សាយបច្ចេកទេសកសិកម្ម ដល់កសិករ​ក្នុងន័យរួមចំណែក​កាត់បន្ថយ​នូវ​ការ​​បាត់បង់ស្រូវ​ក៏ដូចជា​កាត់បន្ថយនូវភាព​ក្រីក្រ​នៅ​ជនបទផងដែរ ។          ដោយការទទួលបាននូវស្រូវអង្ករ​ច្រើន​ហើយប្រកបទៅដោយ​គុណភាព​​ មាន​ជាប់ទាក់ទង​ជាមួយកត្ដាជាច្រើន​​ឯកសារ​នេះ​បានរៀបរាប់​អំពី​បច្ចេក​ទេស​សម​ស្រប​នានាចាប់ពីការដាំដុះរហូតដល់កិនជាអង្ករ ។ I. ការដាំដុះ និងគ្រប់គ្រងស្រូវអោយបានទិន្នផលខ្ពស់ និងមានគុណភាពល្អ ១. ភ្ជួររាស់ដីឱ្យសព្វ និងស្មើដើម្បីឱ្យស្រូវលូតលាស់ និងទុំដំណាលៗគ្នា​ហើយគ្រាប់មាន ទំហំ និងសំណើមប្រហាក់ប្រហែលគ្នា ។  ២. ជ្រើសរើសពេលវេលា និងអត្រាដាំដុះឱ្យសមស្រប ។  ៣. ជ្រើសរើសកម្រិតដាំដុះឱ្យសមស្រប ព្រោះបើដើមស្រូវដុះញឹកពេកធ្វើឱ្យវាពុំសូវមាំ(ងាយដួលរលំ) ហើយផ្ដល់គ្រាប់តូចៗ​ឬស្ដើងៗ​​។​ផ្ទុយទៅវិញ បើដើមរង្វើលពេកធ្វើឱ្យមានដុះស្មៅចង្រៃច្រើន ឬ មានការបែកគុម្ពខ្លាំង ធ្វើឱ្យគ្រាប់ស្រូវក្នុងគុម្ព ឬ​ក្នុងកួរ​តែមួយមិនអាចទុំបានដំណាលៗគ្នា ។  ៤. ដាក់ជីឱ្យស្មើ និងក្នុងពេលសមស្របដើម្បីធ្វើឱ្យដើមស្រូវលូតលាស់ និងបែកគុម្ពស្មើៗគ្នា ។  ៥. រក្សាឱ្យមានទឹកដក់ក្នុងស្រែស្មើៗជាប្រចាំ និងបង្ហូរចេញមុនពេល ច្រូតកាត់ ។   ៦. ពិនិត្យមើលដំណាំស្រូវជាប្រចាំ​ហើយត្រូវកំចាត់ជម្ងឺ ឬសត្វល្អិត​ពីព្រោះវាអាចធ្វើឱ្យ គ្រាប់​ស្រូវខូចរូបរាង ឬ មានចំណុច​អុចខ្មៅៗ​។ ដង្កូវរូងដើម​ធ្វើឱ្យស្រូវស្កក ឬ មិនដាក់​គ្រាប់ពេញ ។  ៧. កុំឱ្យមានស្មៅចង្រៃដុះក្នុងស្រែ ព្រោះវាដណ្ដើមជីជាតិ និង ពន្លឺព្រះអាទិត្យ ធ្វើឱ្យស្រូវដុះលូតលាស់​ខ្សោយ ហើយគ្រាប់មាន​ទំហំតូច ។ មួយវិញទៀតគ្រាប់ស្មៅទាំង​នោះ​នឹងលាយឡំជា​មួយ​គ្រាប់ស្រូវ ។  ៨. ប្រមូលផលនៅពេលស្រូវទុំសមស្រប ហើយបោកបែនសម្អាត និងសម្ងួត ឱ្យឆាប់ និង ត្រឹមត្រូវ ។  ៩. ទុកដាក់ឱ្យគត់មត់ និងត្រឹមត្រូវ ។ គ្រាប់ស្រូវដែលយក​ទៅ​ទុកដាក់ត្រូវតែមាន​​សភាព​ស្អាត និង ស្ងួតគ្រប់គ្រាន់ហើយត្រូវការពារ​វាកុំឱ្យរងការ បំផ្លាញពីសត្វល្អិត សត្វស្លាប កណ្ដុរ ជម្ងឺផ្សិត និង ការឡើងចុះសំណើម ។   ក្រមង៉ុយ ៖ “កត្ដិកធ្លាក់ខ្យល់ តំកល់ទឹកនៅ បើចង់បានស្រូវ ស្រេចនៅត្រឹមថែ ” II. ការច្រូតស្រូវ  គោលបំណងនៃការច្រូតស្រូវគឺដើម្បីៈ          - ទទួលបានគ្រាប់ស្រូវច្រើន និង         - ទទួលបានគ្រាប់ស្រូវមានគុណភាពល្អ ក្រៅពីត្រូវដឹងនូវអាយុកាលរបស់វា យើងអាចច្រូតស្រូវ បានៈ  ២ ចាប់ពី២៨ ទៅ ៣៥ថ្ងៃ សម្រាប់ស្រូវប្រាំង និងចាប់ពី ៣២ ទៅ៣៨ ថ្ងៃ​សម្រាប់​ស្រូវ​វស្សា​បន្ទាប់ពីវាចេញផ្កាបាន ៥០% - កាលណាមានគ្រាប់ពី ៨០ ទៅ ៨៥% មានពណ៌ដូចចំបើង (លឿងទុំ)។  - កាលណាគ្រាប់មានសភាពរឹង តែមិនស្រួយនៅពេលខាំ ។  - កាលណាគ្រាប់មានអត្រាសំណើមពី ២០ ទៅ ២៥% ។  បើក្រច្រូត គ្រាប់ស្រូវនឹងស្ងួតជ្រុល ឬ ទុំញោសហើយ​ជ្រុះខ្ចាត់ខ្ចាយច្រើន ព្រមទាំងធ្វើ​ឱ្យវាងាយ​ប្រេះស្រាំនៅ​ពេល​បោក​បែន ហើយបាក់ខ្ទេចនៅពេល កិនជាអង្ករ ។ តែបើ​ឆាប់​ច្រូត​ពេកគ្រាប់ស្រូវជាច្រើននឹងនៅស្ទើរ ហើយធ្វើឱ្យពិបាក​បោក​បែន ។ គ្រាប់ស្រូវដែលនៅស្ទើរមានភាពស្ដើង ហើយមានសាច់ខាងក្នុងផុសៗដូចដីស ធ្វើឱ្យមានកន្ទក់ និងចុងអង្ករច្រើននៅពេលកិនជាអង្ករ ។           ការពិនិត្យមើលគ្រាប់ស្រូវក្នុងគួរ                            ឯកឧត្តមរដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ                                                                                               ពិនិត្យមើលស្រូវក្នុងស្រែរួម អ្វីដែលគួរធ្វើ ?  ២ គួរបង្ហូរទឹកចេញពីក្នុងស្រែពី ៧ ទៅ ១០ ថ្ងៃ នៅមុនពេលច្រូត ឬ នៅ ពេលដែលគ្រាប់ស្រូវនៅចុងកួរភាគច្រើនដាក់ម្សៅ ហើយឡើងរឹង ឬ ប្រែពណ៌ពី បៃតង​ទៅលឿង។  - គួរលៃលកបោកបែនភ្លាម ឬឱ្យឆាប់តាមដែលអាចធ្វើបានបន្ទាប់ពីច្រូតរួច ដើម្បីកុំឱ្យគ្រាប់ស្រូវឡើងសំណើមវិញ ដែលនាំ​ឱ្យវាងាយបាក់ខ្ទេច។ការ​ខក​ខា​ន​មិនបានហាលសម្ងួតគ្រាប់ស្រូវឱ្យបានឆាប់ ធ្វើឱ្យគ្រាប់អង្ករឡើងពណ៌ លឿង ។  - ប្រសិនបើគ្រាប់ស្រូវមានភាពទទឹកដោយទឹកសន្សើម ឬ ទឹកភ្លៀង គួររង់ ចាំឱ្យវាស្ងួត ឬ ស្រស់ទឹកសិន សឹមច្រូត ។  - នៅពេលដាក់កណ្ដាប់រាយក្នុងស្រែ គួរធ្វើឱ្យកួរស្រូវស្ងួត ដោយដាក់វា ឱ្យខ្ពស់ផុតពីទឹក ឬ ដីសើម ។  III. ការបោកបែនស្រូវ  អាស្រ័យទៅតាមទម្លាប់ និងលទ្ធភាព យើងអាចបោកបែនស្រូវតាមវិធី ផ្សេងៗដូចក្នុងរូបភាពខាងក្រោម៖ ទោះជាបោកបែន​ដោយវិធីណាក៏ដោយយើងត្រូវតែប្រយត្ន័ដើម្បីចៀសវាងការធ្វើឱ្យបែក ឬរលាត់សម្បកស្រូវ (អង្កាម)​និងប្រេះ ឬស្រាំគ្រាប់អង្ករខាងក្នុង          - កាលណាសម្បកស្រូវបែក ឬ រលាត់វាងាយរងការបំផ្លាញពីសំណើមការកើតផ្សិត និងសត្វល្អិត ។          - កាលណាគ្រាប់អង្ករខាងក្នុងមានភាពប្រេះ ឬ ស្រាំវាងាយនឹងបាក់ខ្ទេចនៅពេលកិន           ការបោកបែនតាមវិធីបុរាណ ឬ ប្រពៃណី គឺជាវិធីដ៏ល្អ ប៉ុន្ដែវាទាមទារ ឱ្យចំណាយពលកម្ម និងពេលវេលាច្រើន ។  ប្រសិនបើយើងបោកបែនដោយម៉ាស៊ីនៈ          - គ្រាប់ស្រូវគួរមានអត្រាសំណើម ពី ២០ ទៅ ២៥% ។ ស្រូវសើមជាងនេះ ធ្វើឱ្យពិបាកបោក ឬ ប្រឡេះគ្រាប់ពីចំបើងមិនអស់ តែបើស្ងួតជាងនេះ​ធ្វើឱ្យងាយប្រេះស្រាំគ្រាប់ ។          - គួរប្រយ័ត្នកុំឱ្យត្បាល់ម៉ាស៊ីនបោកវិលលឿនពេក (លឿនជាង ៦០០ជុំក្នុង មួយនាទី ឬ ចុងធ្មេញត្បាល់លឿនជាង ១២ ម៉ែត្រ ក្នុងមួយវិនាទី) ។​កាល​ណា​វាវិលយឺតពេកធ្វើឱ្យបយឺតឬ ប្រឡេះគ្រាប់ពីចំបើងមិនអស់តែបើវាវិលលឿនពេក ធ្វើឱ្យគ្រាប់ស្រូវរងកម្លាំងវាយផ្ទប់ខ្លាំងហើយ​ងាយ​បែក​ឬ រលាត់​សម្បក និងប្រេះស្រាំអង្ករ ។  ចំណាំៈ          - ការខកខានមិនបានបោកបែនស្រូវ និងហាលសម្ងួតឱ្យបានឆាប់បន្ទាប់ពីច្រូតរួចអាចធ្វើឱ្យគ្រាប់អង្ករឡើងពណ៌ស្រអាប់ លឿង ឬខ្មៅ ឬរលួយខូច តែម្ដង ។         - ការប្រមូល និង ដឹកជញ្ជូនកណ្ដាប់ស្រូវទៅកាន់ទីលានបោកបែនត្រូវតែធ្វើដោយប្រុងប្រយត្ន័ ព្រោះវា​អាច​ធ្វើ​ឱ្យជ្រុះខ្ចាត់ខ្ចាយច្រើន ។ IV. វិធីទុកដាក់ និង ការពារស្រូវ បន្ទាប់ពីច្រូតកាត់ និង បោកបែនហើយ យើងត្រូវតែទុកដាក់ស្រូវឱ្យមានសុវត្ថិភាពដើម្បី ជាស្បៀងអាហារ ឬ ជាគ្រាប់ពូជ ទម្រាំតែដល់ ពេលប្រមូលផល ឬ ដាំដុះជាថ្មី ។   យើងអាចៈ យើងអាចទប់ស្កាត់មិនឱ្យខ្មូតបំផ្លាញស្រូវយើងដោយៈ  ១. ហាលស្រូវឱ្យស្ងួត (អត្រាសំណើម ១៤% ឬ ទាបជាងនេះតិចតួច និង សម្អាតវាឱ្យស្អាតកុំឱ្យមានសណ្ដី និង កំទេចកំទី មុននឹងយកទៅទុកដាក់។  ២. ចៀសវាងកុំទុកស្រូវចាស់ជាមួយស្រូវថ្មី។  ៣. ប្រើប្រាស់តែសម្បកបាវស្ងួត និង ស្អាត ។  ៤. ចង ឬ ដេរភ្ជិតមាត់បាវឱ្យជាប់ ។  ៥. សម្អាតកន្លែងទុកដាក់ឱ្យស្អាតជាប្រចាំ ។ ការសម្អាត ឬការធ្វើឱ្យមានអនាម័យ​នៅក្នុងនិងជុំវិញ​កន្លែង​ទុកដាក់​ស្រូវជា​​កិច្ចការ​សាមញ្ញមានតម្លៃថោក តែមានប្រសិទ្ធភាពខ្ពស់។ មូលហេតុសំខាន់ៗដែលធ្វើឱ្យគ្រាប់ ស្រូវថយចុះគុណភាព​ក្នុង​ពេលទុកដាក់មានៈ  ១. ហាលសម្ងួតមិនគ្រប់គ្រាន់ និងមិនត្រឹមត្រូវ ។  ២. សម្អាតមិនបានស្អាត ។  ៣. ខ្យល់ពុំអាចឆ្លងកាត់បានធ្វើអោយគ្រាប់ស្រូវឡើងកម្ដៅជ្រុល និងឡើង សំណើមវិញ ។  ៤. សត្វល្អិត និង ផ្សិតយាយីបំផ្លាញ ។ មានមូលហេតុជាច្រើនដែលធ្វើឱ្យបាត់ស្រូវក្នុងពេលទុកដាក់ៈ ចំណាំៈ                                  - គួរកុំសង់ជង្រុកនៅជិតកន្លែងដែលកខ្វក់ មានដក់ទឹក ឬ ដែលអាចមានប្រភពរាតត្បាតកត្ដាចង្រៃច្រើន ។  - ដើម្បីកុំឱ្យស្រូវសើម និងឡើងកម្ដៅ ជង្រុកត្រូវតែមានដំបូល និង ជញ្ជាំងត្រឹមត្រូវ ប៉ុន្ដែមានខ្យល់បក់ឆ្លងកាត់ ។  - គួរការពារកុំឱ្យស្រូវ ឬ បរិយាកាសនៅកន្លែងទុកដាក់ក្ដៅខ្លាំងពេក ។  - នៅរដូវវស្សា សំណើមស្រូវដែលទុកដាក់ក្នុងបាវក្រចៅ ឬពាងធ្វើពីដីឥដ្ឋអាចនឹងកើនឡើង ។ ខ្យល់អាចឆ្លងកាត់ ហើយអាចពិនិត្យមើលបានស្រួល ធុង ឬបរិក្ខាជិតអាចមានទំរង់ និងទំហំផ្សេងៗ បញ្ហាជាចំបងធ្វើអោយបាត់បង់ស្រូវគឺ ការធ្វេសប្រហែសរបស់យើង ការទុកដាក់ស្រូវនៅក្នុង បរិក្ខារបិតជិត ឬ ធុង (សូមមើល រូបភាព )​ធ្វើឱ្យយើងទទួលបានអង្ករល្អនៅពេលកិន និងមាន​​កម្រិត​​កម្ទេចចុងនៃអង្ករទាប ។ បើយើងទុកគ្រាប់ពូជស្រូវវិញអាចរក្សាគ្រាប់ឱ្យមានដំណុះល្អ ។ ដោយសារ​បរិក្ខារបិតជិតនេះអាចទប់ស្កាត់​បានល្អជាមួយនឹងការជ្រៀត​ចូល​​នៃ​សត្វល្អិត​បំផ្លាញ​គ្រាប់ស្រូវ និង​ការជ្រៀត​ចូលនៃខ្យល់​ដែលបណ្ដាលឱ្យប្រែប្រួល​សំណើម​គ្រាប់ស្រូវធ្វើឱ្យខូចគុណភាព ។          - ចាំបាច់ត្រូវត្រួតពិនិត្យរាល់បរិក្ខារបិតជិតទាំងនោះកុំឱ្យមានប្រេះបែក ធ្លុះធ្លាយ​រហែកមុនពេលយើងយកវាទៅប្រើប្រាស់ ។ហើយស្រូវ​ត្រូវ​ហាលសំងួត ឱ្យស្ងួតល្អសិនមុនពេលទុកដាក់។ ម្យ៉ាងទៀតបរិក្ខារទុកដាក់ទាំងនោះត្រូវតែប្រុងប្រយ័ត្ន​ដោយដាក់​វានៅក្នុងម្លប់ ដើមី្បរក្សាឱ្យ​សីតុណ្ហភាព​ខាង​ក្នុងបរិក្ខារមានសភាពថេរ ជាពិសេសបរិក្ខារទុកដាក់ធ្វើពីលោហធាតុ ឬ ប្លាស់ស្ទីក ដូចជា​ធុងសាំង ធុងជ័រ ធុង ឬបរិក្ខារបិទជិតអាចមានទម្រង់ និង​ទំហំ​ផ្សេងៗនិងស្បោងប្លាស់ស្ទីក ។  V. វិធីកិនបានអង្ករមានគុណភាពខ្ពស់ ដើម្បីទទួលបានអង្ករដែលមានគុណភាពខ្ពស់ៈ  ១. ស្រូវដែលយកទៅកិនត្រូវមានគុណភាពខ្ពស់ ស្ងួតត្រឹមត្រូវ និងគ្មានសម្រាម ។  ២. ម៉ាស៊ីនកិនស្រូវត្រូវបានសម្អាត និង ថែរក្សាត្រឹមត្រូវជាប្រចាំ ។  ៣. អ្នកបញ្ជាម៉ាស៊ីនមានជំនាញ និង ប៉ិនប្រសប់ ។          បើខ្វះតែចំណុចណាមួយខាងលើ អង្ករដែលកិនបានអាចមានកម្រិតទាប និង មានគុណភាពអន់ ។ឧទាហរណ៍ៈ ស្រូវដែលអន់គុណភាពនឹងធ្វើ​ឱ្យអង្ករខ្ទេច និង ក្លាយជាកន្ទក់ច្រើន ហើយមានគុណភាពអន់ទៅតាមនោះ ទោះបីជាម៉ាស៊ីនកិន ស្រូវមានភាពទំនើបបែបណាក៏ដោយ ។ ដូចគ្នាដែរ ទោះបីជាស្រូវមានគុណភាពល្អ ហើយអ្នកបញ្ជាម៉ាស៊ីនមានជំនាញ និងមានភាពប៉ិនប្រសប់បែបណាក៏ដោយ ក៏អង្ករ នៅតែកិនបានតិចហើយអន់គុណភាពដដែលប្រសិនបើម៉ាស៊ីនកិនស្រូវមិនត្រូវបាន ថែរក្សាឱ្យត្រឹមត្រូវជាប្រចាំ ។ ស្រូវដែលមានគុណភាពខ្ពស់ គឺជាស្រូវដែលមានភាពទុំ និង មានការដាក់គ្រាប់ស្មើៗគ្នាមានទំហំ និងរូបរាងគ្រាប់ប្រហាក់ប្រហែលគ្នា ពុំមានភាពប្រេះស្រាំ ពុំមាន លាយឡំទៅដោយក្រួស ឬ សម្រាមផ្សេងៗ ពុំត្រូវបានបំផ្លាញដោយសត្វល្អិត និង ជម្ងឺផ្សិត ហើយមានភាពស្ងួតត្រឹមត្រូវ។  ចំណាំៈ         - ជាមធ្យមការកិនស្រូវធ្វើឱ្យបានអង្កាម ២០% កន្ទក់ ១០% និងអង្ករសម្រិត ៧០% ។នៅក្នុង​អង្ករសម្រិតតែងមាន​​អង្ករដើម និង ចុងអង្ករ ។          - ស្រូវមានគុណភាពអន់ ម៉ាស៊ីនមិនល្អ និង អ្នកបញ្ជាម៉ាស៊ីនមិនមានសមត្ថភាពគ្រប់គ្រាន់​អាចធ្វើ​ឱ្យ​យើង​បាត់​អង្ករអស់ពី ៣ ទៅ ១០% ។  ការកិនមិនត្រឹមត្រូវអាចធ្វើឱ្យៈ  - ស្រូវចេញទៅជាមួយអង្កាម  - មានអង្កាមលាយឡំជាមួយអង្ករសម្រូប - មានចុងអង្ករលាយឡំជាមួយកន្ទក់ - មានកន្ទក់ច្រើន និង - អង្ករមិនសូវស្អាត ។  ករណីមានចម្ងល់ ឬចង់ដឹងពត៌មានពាក់ពន្ឋបច្ចេកទេសក្រោយប្រមូលផល សូមទំនាក់ទំនង លោកបណ្ឌិត មាស ពិសិដ្ឋ   តាមរយៈ  H/P: 012 759 440  Email: pmeas@online.com.kh រៀបរៀងដោយ នាយកដ្ឆានផ្សព្វផ្សាយកសិកម្ម

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.